कैलाली । दार्चुलाको ब्याँस गाउँपालिका( ४ डोकटका ४० वर्षीय नरसिंह विष्टको हत्याको आरोपमा वर्तमान र निवर्तमान वडाध्यक्ष पक्राउ परेको छ ।
मङ्सिर ३ गते रातिदेखि बेपत्ता रहेका विष्टको मङ्सिर ४ गते घरभन्दा अलि टाढा खोल्सामा मृत अवस्थामा फेला परेका थिए । उक्त घटनाबारे अनुसन्धान गर्न प्रहरीले गाउँपालिकाका वर्तमान वडाध्यक्ष ४३ वर्षीय झुनसिंह विष्ट , पूर्व वडाध्यक्ष ५५ वर्षीय संग्रामसिंह विष्ट र ४३ वर्षीय स्थानीय मोहनसिंह विष्टलाई पक्राउ गरेको हो ।
जिल्ला प्रहरी कार्यालय दार्चुलाका प्रवक्ता प्रहरी निरीक्षक राजेश शाहीको अनुसार उनीहरूलाई बुधबार नियन्त्रणमा लिई सोधपुछका लागि ५ दिनको म्याद थप गरी हिरासतमा राखिएको छ ।
नरसिंह विष्टको घटना लगत्तै प्रहरीले सोही ठाउँका २५ वर्षीय दीपक विष्टलाई पक्राउ गरेको थियो । प्रहरीले घटनामा दोषि पुष्टि गर्दै दिपकलाई मङ्सिर १२ गते सार्वजनिक गरेको थियो ।
वयानमा दिपकले मङ्सिर ३ गते राति १० बजेतिर गाउँपालिकाको वडा नम्बर ४ डोबस्थित दार्चुला–तिंकर सडक खण्डमा नरसिंहसँग भेट भएको र आफूले मादक पदार्थ सेवन गरेको अवस्थामा विवाद भएपछि उनको टाउकोमा ढुङ्गा प्रहार गरेर हत्या गरेको बताएका थिए ।
प्रहरीले घटनाको थप अनुसन्धानको लागि निवर्तमान र वर्तमान वडाध्यक्ष सहित थप तीन जनालाई पक्राउ गरेको जनाएको छ ।
