एजेन्सी । इंग्ल्याण्ड फुटबल टिमका अनुभवी खेलाडी रहिम स्टर्लिङ टोली छाडेर स्वदेश फर्किएका छन् । रहिमको घरमा केही हतियारधारी व्यक्ति घुसेका थिए ।
यसपछि उनले टोली छाडेर कतारबाट स्वदेश फर्कने निर्णय गरेका छन् । उनको टोली क्वार्टरफाइनलमा शक्तिशाली फ्रान्ससँग भिड्दै छ र महत्वपूर्ण खेलका लागि स्टर्लिङ उपलब्ध हुनेमा शंका छ ।
उनी यो महत्वपूर्ण खेलबाट बाहिर रहन सक्छन् । यो खेल शनिबार हुनेछ । यद्यपि, स्टर्लिङले घर गएर कतार फर्कने समय भने पाउनेछन् ।
इंग्लिस फुटबल एसोसिएसनले चेल्सीका फरवार्डलाई पारिवारिक मामिला सुल्झाउन समय दिएको खुलासा गरेको छ । यही कारणले सेनेगलविरुद्धको खेलमा उनले खेलेका थिएनन् । उनको टोलीले खेल ३–० गोलले जित्दै क्वाटरफाइनलमा स्थान बनाएको छ ।
बेलायती सञ्चारमाध्यमका अनुसार शनिबार राति उनको परिवार त्यहाँ रहेको बेला स्टर्लिङको घर घुसपैठिले तोडफोड गरेका थिए । इङ्ल्यान्डका प्रबन्धक ग्यारेथ साउथगेटले भने, ‘अहिलेको प्राथमिकता उसको परिवारसँग हुनु नै हो । हामी उनलाई समर्थन गर्नेछौं र उनलाई जति समय चाहिन्छ त्यो दिनेछौं ।’
साउथगेटको ६ वर्षको कार्यकालमा स्टर्लिङ इंग्ल्याण्डका लागि महत्वपूर्ण खेलाडी थिए । २७ वर्षीय रहिमले आफ्नो देशका लागि ८१ खेलमा २० गोल गरेका छन् । २०२२ को विश्वकपमा इरानलाई ६–२ ले हराउँदा उनले पनि गोल गरेका थिए ।
