काठमाडौँ । दुई परिवारको विवादमा घरेलु हतियारको प्रहारबाट धनुषामा एकजनाको हत्या भएको छ । घटनामा अन्य चार जना घाइते भएका छन् । मिथिला विहारी नगरपालिका–४ रमौलका ५३ वर्षीय प्रभु यादवको हत्या भएको हो ।
घटना बिहीबार राति ८ बजे भएको हो । स्थानीय सुरज यादव परिवारको समूहले घरेलु हतियारसहित घरमै आएर प्रभु यादवमाथि घरेलु हतियार प्रहार गरेको उनका छोरा अशोक यादवले बताएका छन् । बुबाको घटनास्थलमै मृत्यु भएको थियो ।
सो घटनामा प्रभुकी श्रीमती महाजनीदेवी, जेठो छोरा जगरनाथ, माहिलो छोरा सन्तोष र कान्छो छोरा अशोक घाइते भएका छन् । प्रहरीका अनुसरा सन्तोषको टाउकोमा १८ वटा टाँका लगाइएको छ भने एउटा हातका दुई वटा औँला काटिएका छन् । अन्य सामान्य घाइते छन् । घाइतेको प्रादेशिक अस्पतालमा उपचार भइरहेको छ । मृतकको शव परीक्षणका लागि प्रादेशिक अस्पताल जनकपुरमा राखिएको छ ।
प्रहरीले दुई परिवारबीचको विवादमा प्रभुको हत्या भएको आशंका गरेको छ । केही व्यक्तिलाई पक्राउ गरेर अनुसन्धान भइरहेको समेत प्रहरीले बताएको छ ।
मृतक प्रभुका कान्छा छोरा अशोकले राति ८ बजे खाना खाएर बुबा दैलोमा आगो ताप्न बसेको बेला सुरज यादवसहित १० जनाको समूहले बञ्चरो, खुकुरीसहित आक्रमण गरेको थियो ।
झण्डै दुई महिनाअघि सुरजको बाख्राले प्रभुको बाली खाएको विषयलाई विवाद भएको बताइएको छ । विवाद बढेपछि गाउँलेहरुको भेलामा सुरजले प्रभुसँग माफी मागेका थिए । बिहीबारको घटना सोही विवादसँग सम्बन्धित रहेको बताइएको छ ।
