कैलाली । बाजुरामा विद्यार्थी नेता चेतन अयडीको हत्याको आरोपमा वडाध्यक्षसहित तीनजना पक्राउ परेका छन् । जिल्ला प्रहरी कार्यालय बाजुराले हत्याको आरोपमा त्रिवेणी नगरपालिका वडा नम्बर ७ का वडाध्यक्ष जुद्धबहादुर अयडीसँगै तीन जनालाई पक्राउ गरेको हो ।
मृतकका आफन्तले हत्यामा संलग्न भएको भन्दै वडा अध्यक्ष अयडीसहित २२ जनाविरुद्ध जाहेरी दिएका थिए । ती मध्ये वडाध्यक्ष सहित तीन जनालाई पक्राउ गरेको प्रहरीले जनाएको छ ।
मंसिर ४ गते एमाले निकट विद्यार्थी सङ्गठन अनेरास्ववियुका केन्द्रीय सदस्य तथा सुदूरपश्चिम विश्व विद्यालय अध्यक्ष अयडीलाई घरमा सुतिरहेकाबेला बीभत्स हत्या गरिएको थियो ।
अहिले पक्राउ परेको वडाध्यक्ष एक महिना अघि मात्र धरौटीमा छुटेका थिए । नाटेश्वरी मन्दिरमा दलित पसेको भन्दै कुटपिट गरेको अभियोगमा उनलाई पक्राउ गरिएको थियो।
