काठमाडौँ । नेकपा (एमाले)ले चुनावी घोषणा पत्र सार्वजनिक गरेको छ ।
मंगलबार दिउँसो काठमाडौंको याक एण्ड यति होटलमा अध्यक्ष केपी शर्मा ओलीले डिजिटल प्रविधिबाट आसन्न प्रतिनिधिसभा र प्रदेशसभा निर्वाचनका लागि पार्टीको घोषणा प्रविधिबाट सार्वजनिक गर्नु भएको हो ।
घोषणा पत्रमा पार्टीले अघि सारेको ‘समृद्ध नेपालः सुःखी नेपाली’को राष्ट्रिय संकल्पलाई निरन्तरता दिइएको छ । करिव २० हजार शब्द रहेको घोषणा पत्रमा मुलुकको समृद्धिका लागि राष्ट्रिय अर्थतन्त्रको निर्माणमा जोड दिइएको छ ।
घोषणा पत्रमा सूर्य चिन्हमा किन मतदान गर्ने भन्ने कुरालाई प्रष्ट्याउने प्रयास गरिएको बताइएको छ । अहिले अध्यक्ष ओलीले घोषणा पत्रको मुख्यमुख्य अंशबारे ब्याख्या गरिरहनु भएको छ ।
घोषणापत्रमा एमालेले सामाजिक सुरक्षाका विषयलाई उच्च प्राथमिकतामा राखेको छ । यद्यपि ज्येष्ठ नागरिक भत्ताको अंक पहिला जस्तो तोकेको छैन ।
विगतमा ज्येष्ठ नागरिकलाई पाँच हजार भत्ता दिने घोषणा गरेको थियो । तर यसपटक त्या भन्दा बढी पनि दिन सकिन्छ र ज्येष्ठ नागरिक भत्तालाई नयाँ रुपमा वितरण गर्न सकिने भएकाले अंक उल्लेख नगरिएको बताइएको छ ।
७१ पृष्ठको घोषणापत्रमा पाँच वर्षमा गर्ने २० वटा कामलाई उल्लेख गरिएको छ । समृद्धि अधिवेशन गर्ने, खेत खेतमा पानी, खाडीमा होइन बारीमा जवानी, ५ वर्षमा २५ लाख रोजगारी, फ्रि मिटर १० हजार लिटर जस्ता कार्यक्रमहरु घोषणापत्रमा उल्लेख गरिएको छ ।
यस्तै स्वास्थ्यको क्षेत्रमा नागरिकलाई सहज सेवा उपलब्ध गराउन प्रेसर सुगर, टेन्सन ओभर जस्ता कार्यक्रम ल्याइएको उल्लेख छ ।
घोषणा पत्र सार्वजनिक भएसँगै ‘ओलीसँग लाईभ डिबेट’ पनि यहीँबाट सुरु हुने एमालेले जनाएको छ । सत्तारुढ गठबन्धनमा आवद्ध नेपाली काँग्रेस, नेकपा (माओवादी केन्द्र), नेकपा (एकीकृत समाजवादी)ले संविधानको रक्षालाई मूल नारा बनाएर यस अघिनै चुनावी घोषणा पत्र सार्वजनिक गरिसकेका छन ।
