काठमाडौँ । संस्कृति पर्यटन तथा नागरिक उड्ययन मन्त्री जीवनराम श्रेष्ठविरुद्ध निर्वाचन आयोगमा उजुरी परेको छ ।
उपभोक्ता हित संरक्षण मञ्च नेपालले व्यापारीबाट प्रभावित भएर मन्त्री श्रेष्ठले प्रतिबन्धित मदिराको आयात निर्वाचन अघि नै खुलाउन लागि परेको भन्दै उनीमाथि कारबाहीका लागि आयोगमा उजुरी दर्ता गराएको हो ।
मञ्चले निर्वाचनको संघारमा आफैँ उम्मेदवार र मन्त्री जस्तो पदमा रहेको व्यक्तिले व्यापारीलाई लाभ पुग्नेगरी मदिराको आयात खोल्न लाग्नु निर्वाचन कसुर ऐनको बर्खिलाप भएको जनाएको छ ।
मंसिरसम्म मदिराको आयातमाथि प्रतिबन्ध कायमै राख्नुपर्ने भन्दै मञ्चले भनेको छ, “मदिरा आयात खोल्न दबाव दिने उम्मेदवार एवं मन्त्री श्रेष्ठलाई कारबाही गरिनु पर्छ ।”
मञ्चले प्रतिबन्धित वस्तुको आयात निर्यातको अनुमति र निर्णय गर्ने निकाय उद्योग, वाणिज्य तथा आपूर्ति मन्त्रालय रहेको समेत उल्लेख गरेको छ । मन्त्री श्रेष्ठले नेपाल सरकार कार्यविभाजन नियमावली विपरीत कार्य गर्न खोजेको मञ्चले आरोप लगाएको छ ।
