काठमाडौँ । स्वास्थ्य अवस्थामा क्रमिक सुधार आएपछि राष्ट्रपति विद्यादेवी भण्डारी आज अस्पतालबाट डिस्चार्ज हुँदै हुनुहुन्छ ।
अस्वस्थ भएपछि उहाँ यही असोज २२ गते त्रिवि शिक्षण अस्पतालमा भर्ना हुनुभएको थियो । भोलिपल्ट परीक्षणमा उहाँलाई कोरोना संक्रमण पुष्टि भएको थियो ।
अस्पतालका चिकित्सकहरुले राष्ट्रपतिको स्वास्थ्यमा सुधार भएको र ज्वरो र खोकी पनि कम भएको बताएका छन् । आवश्यक परे अब राष्ट्रपति भवनमै गएर थप परीक्षण र उपचार गर्न सकिने पनि चिकित्सकहरुको भनाइ छ ।
