नेपाल राष्ट्र बैंकका डेपुटी गभर्नर बमबहादुर मिश्रले बैंकको ब्याजदर वृद्धि अस्थायी भएकाले व्यवसायीहरु आत्तिनुपर्ने अवस्था नरहेको बताउनुभएको छ ।
बुधवार नेपाल आर्थिक पत्रकार संघ (नाफिज) को वार्षिक जर्नल अर्थचित्र विमोचन तथा आर्थिक पत्रकार पुरस्कार समारोहलाई सम्बोधन गर्दै डेपुटी गभर्नर मिश्रले यस्तो बताउनुभएको हो । उहाँले बैंकको ब्याजदर बढ्ने ट्रेण्ड सामान्य भएको भन्दै वृद्धि भएको ब्याजदर चाँडै घट्ने दाबी गर्नुभयो । उहाँले अहिले संसारभर ब्याजदर बढाउने ट्रेण्ड चलेकाले नेपालमा पनि त्यसको प्रभाव परेको उल्लेख गर्नुभयो ।
मिश्रले मुलुकको अर्थतन्त्र अफ्ठ्यारो अवस्थामा नभएको बताउनु भयो । उहाँले पछिल्लो समय विदेशी मुद्रा सञ्चितिमा ठूलो योगदान पु¥याउने रेमिट्यान्स प्रत्येक महिनामा बढ्दै गइरहेको बताउनु भयो । उहाँले नेपालमा रेमिट्यान्स तथा विदेशी पर्यटनको आगमन बढेकाले अर्थतन्त्रमा थप सुधार आउने बताउनु भयो । उहाँँले आगामी मौद्रिक नीतिको समीक्षामा खुशी प्राप्त हुनसक्ने संकेत देखिएको बताउनु भयो ।
डेपुटी गभर्नर मिश्रले भन्नुभयो,‘ समय सधैँ एकै किसिमको बस्दैन । कोरोनाको अढाई वर्षेकाल र पछिल्लो रुस र युक्रेन युद्धको कारण ८ महिनाको समयमा विश्व अर्थतन्त्रमा केही मन्दीको संकेत देखापर्न आएको छ । अमेरिकाको फेडरिर्जभ बैंक,भारतीय रिर्जभ बैंक,बैंक अफ इंग्ल्याण्डले र बैंक अफ अष्टे«लियाले ब्याजदर केही मात्रामा बढाउँदै लगेको हुनाले अन्तराष्ट्रिय स्तरमा तथा नेपालमा केही बैंक ब्याजदर बढेको छ ।’
‘त्यो एक किसिमको ट्रेण्ड हो ट्रेन तलमाथि भइरहन्छ । हामी आत्तिनुपर्ने अवस्था रहँदैन । मुलुकको अर्थतन्त्र जुन किसिमले हेरिरहेका छौं । राष्ट्र बैंकले हेरक महिना तथ्याङ्क निकाले गरेको छ । तथ्याङ्कलाई हेर्दा नेपालको अर्थतन्त्र धेरै अफ्ठ्यारो स्थितिमा छैनौं । तर संसारको हावा एकातिर हिँडेको छ नेपाल अर्को तिर हिँड्न समस्या हुन्छ । अहिले नेपाल त्यही हावासँगै बगेका छौं । अहिले अर्थतन्त्रमा केही राहत दिने सुचाङ्कहरु देखापरेका छन् । विदेशी मुद्रा सञ्चिति बढाउन सहयोग गर्ने रेमिट्यान्स हरेक महिना बढेकाले आशा लागेको छ ।’
‘नेपालमा पर्यटन आगमन बढ्दै गएको छ । त्यसबाट राष्ट्र बैंक आशावादी छ । मौद्रिक नीतिको समीक्षामा केही खुशी हुने संकेत प्राप्त हुनेछ । नेपाल कृषिजन्य उत्पादन तथा विद्युतमा आत्मनिर्भर बन्दै गएको भनिएपनि मुलुक आत्मनिर्भर बन्न लामो पाइला चलाउन आवश्यक छ । त्यसको लागि सबै पक्षको योगदान आवश्यक रहेको छ ।’
उहाँले कृषि र पर्यटनबाट क्षेत्रको विकासबाट नै मुलुकलाई आत्मनिर्भर बनाउन सम्भव रहेको बताउनु भयो । उहाँले मुलुक आत्मनिर्भर बन्न लामो पाइला चलाउन आवश्यक भएको भन्दै सरकार र निजी क्षेत्र सबै मिलेर जानुको विकल्प नभएको बताउनु भयो ।
