काठमाडौँ । मंगलबारदेखि सर्वोच्च अदालतका वरिष्ठतम न्यायाधीश हरिकृष्ण कार्की कायममुकायम प्रधानन्यायाधीश बन्नुभएको छ । कामु प्रधानन्यायाधीश दीपककुमार कार्की तीर्थाटनका लागि मंगलबार भारत गएपछि हरिकृष्ण कामु प्रधानन्यायाधीश बन्नुभएको हो ।
यही असोज १५ गते कामु प्रधानन्यायाधीश दीपककुमार कार्की ६५ वर्षे उमेरहदका कारण अनिवार्य अवकासमा जाँदै हुनुहुन्छ । त्यसपछिको सर्वोच्चको बागडोर कामु प्रधानन्यायाधीशको हैसियतमा हरिकृष्ण कार्कीले सम्हाल्नुहुनेछ ।
तर अवकास पाउनुअघि नै कामु प्रधानन्यायाधीश दीपककुमार कार्की भारत तीर्थाटनका लागि जानुभएकाले मंगलबारदेखि हरिकृष्ण कार्कीले सर्वोच्च अदालतको नेतृत्व लिने हुनुभएको हो ।
गत फागुन १ गते महाअभियोग लागेपछि तत्कालीन प्रधानन्यायाधीश चोलेन्द्रशम्शेर जबरा निलम्बनमा पर्नुभएको छ । उहाँमाथिको महाअभियोगको टुंगो नलागेका कारण सर्वोच्चको काम कारबाही कामु प्रधानन्यायाधीशबाट हुँदै आएको छ ।
महाअभियोगको टुंगो नलागे पनि निलम्बित प्रधानन्यायाधीश जबरा आगामी मंसिर २७ गते ६५ वर्षे उमेरहदका कारण अनिवार्य अवकासमा जानुहुनेछ । यद्यपि हरिकृष्ण कार्कीले त्यसपछि पनि लगत्तै पूर्ण प्रधानन्यायाधीशका रुपमा काम गर्न पाउनुहुने छैन ।
प्रधानन्यायाधीश बन्नका लागि न्याय परिषद्ले वरिष्ठ तीन जना न्यायाधीशको नाम संसदीय सुनुवाइ समितिमा पठाउनुपर्ने संवैधानिक व्यवस्था छ । सुनुवाइ समितिले कुनै एक न्यायाधीशको नाम अनुमोदन गरेपछि उनलाई राष्ट्रपतिबाट सपथ खुवाएपछि मात्र पूर्ण प्रधानन्यायाधीशका रुपमा मानिनेछ ।
आगामी मंसिर ४ गते प्रतिनिधिसभाको निर्वाचन भई सबै स्थानको नतिजा आउन केही समय लाग्न सक्नेछ । प्रतिनिधिसभाको निर्वाचनपछि संसदीय समिति गठन प्रक्रिया पूरा गर्न करिब तीन/चार महिना लाग्नसक्ने अघिल्लो पटकको प्रतिनिधिसभाको निर्वाचनबाट प्रष्ट भएको छ ।
यस हिसाबले कामु प्रधानन्यायाधीश हरिकृष्ण कार्की संसदीय सुनुवाइ समितिले अनुमोदन गरेको अवस्थामा पनि कम्तीमा चैतपछि मात्र पूर्ण प्रधानन्यायाधीश बन्नुहुने देखिएको छ ।
यद्यपि निलम्बित प्रधानन्यायाधीश जबरा अनिवार्य अवकासमा गएपछि पनि संसदीय सुनुवाइ समितिले अनुमोदन नगरेसम्म उहाँ नै कामु प्रधानन्यायाधीशको जिम्मेबारीमा रहनुहुनेछ ।
