काठमाडौँ । चालु आर्थिक वर्ष २०७९/०८० को पहिलो दुई महिनामा नेपालको कुल आयात रु तीन खर्बभन्दा बढी भएको छ । चालु आवको पहिलो महिना साउनमा कुल आयात रु एक खर्ब ३१ अर्ब भएकामा भदौ महिनामा बढेर रु एक खर्ब ८३ अर्ब पुगेको छ । दशैँका कारण भदौ महिनामा आयातमा वृद्धि भएको बताइएको छ ।
समीक्षा अवधिमा सबैभन्दा धेरै रु १८ अर्ब ४२ करोडको डिजल आयात भएको छ। यो अवधिमा पेट्रोल १२ अर्ब १८ करोड र ग्यास १० अर्बको आयात भएको छ।
त्यसैगरी फलामजन्य वस्तु १३ अर्ब ४५ करोडको आयात भएको भने यस्तै पाम तेल छ अर्ब ३२ करोडको आयात भएको छ । यस अवधिमा सोयाबिन तेल छ अर्ब ४४ लाखको आयात भएको छ।
चालु आवको पहिलो दुई महिनामा भएको आयात गत आर्थिक वर्षको सोही अवधिको तुलनामा भने १३ प्रतिशतले कम हो ।
यस अवधिमा निर्यातमा भने व्यापक गिरावट आएको छ । साउन र भदौ महिनामा कुल २८ अर्ब ६८ करोडको मात्र निर्यात भएको छ । गत वर्षको यसै अवधिमा कुल ४४ अर्बको निर्यात भएको थियो । निर्यात गत वर्षको तुलनामा ३४ प्रतिशतले कम भएको छ । समीक्षा अवधिमा नेपालको व्यापार घाटा रु दुई खर्ब ४४ करोड ९१ लाख पुगेको छ ।
नेपालको कुल वैदेशिक व्यापारमा आयातको हिस्सा ९०.५१ प्रतिशत र निर्यातको हिस्सा ९.४९ प्रतिशत रहेको छ ।
