काठमाडौँ । नेकपा (एमाले) का अध्यक्ष केपी शर्मा ओलीले नेकपा (एमाले) र नेकपा (माओवादी केन्द्र) बीचको एकतामा माओवादी अध्यक्ष पुष्पकमल दाहाल प्रचण्डले गम्भीर घात गरेको बताउनुभएको छ ।
प्रचण्डको गृहजिल्ला चितवनका माओवादी नेताहरुलाई पार्टी प्रवेश गराउँदै उहाँले आफैँले अँगालो हालेर पार्टी अध्यक्ष बनाएर आफ्नै छेउमा राख्दा पनि प्रचण्डले आफूमाथि नै छुरा धस्न आएको बताउनुभयो । “मैले अध्यक्ष बनाएर आफ्नै छेउमा राखेँ तर उन (प्रचण्ड)ले त मलाई नै ग्वाम्मै छुरा रोपे”। अध्यक्ष ओलीले भन्नुभयो ।
चण्डले आफूलाई साधारण सदस्यबाटै निकालेको भनी गर्व गरेको अभिव्यक्ति दिँदै गरेको भिडियो हेरेको भन्दै उहाँले भन्नुभयो, “कस्तो व्यक्तिलाई मैले विश्वास गरेर पार्टी एकता गरेछु अहिले अचम्म लाग्छ । मैले दिएको बहुमत मविरुद्ध नै प्रयोग गर्न खोज्ने । म भन्दै थिएँ, पर्खिनुस् महाधिवेशनबाट अध्यक्ष बनाउँछु । तर, उनी भने मसँग बहुमत पुगिसक्यो भनेर निकाल्न तम्सिएछन् ।”
उहाँले अहिलेको एमाले प्रचण्डबाहेको पहिलेकै नेकपाको निरन्तरता रहेको भन्दै अदालतले पार्टीको नाममात्र जुध्यो भनेको तर नेकपा विभाजन नभएको बताउनुभयो ।
