काठमाडौँ । राष्ट्रियसभा सदस्य नारायणकाजी श्रेष्ठले मन्त्रीहरुले निर्वाचनमा प्रचारप्रसार गर्न पाउनुपर्ने बताउनुभएको छ ।
राष्ट्रियसभा, राष्ट्रिय सरोकार तथा समन्वय समितिको सोमाबार बसेको बैठकमा मन्त्रीहरुले निर्वाचन प्रचारमा जान नपाउने निर्वाचन आयोगको आचारसंहिताको व्यवस्थाप्रति आपत्ति जनाउनुभयो ।
उहाँले राजनीतिक प्रणाली बहुदलीय हुने र त्यही प्रणालीमा नेताहरु मन्त्री हुने हुँदा मन्त्रीहरु आफैँ उम्मेदवार हुँदाबाहेक अन्त चुनाव प्रचार गर्न मिल्दैन भन्ने नमिलेको बताउनुभयो ।
निर्वाचन आयोगले मन्त्रीहरुले निर्वाचन प्रचारमा जाँदा राज्य र सरकारको साधन स्रोतको दुरुपयोग भएको छ कि छैन भन्नेबारे अनुगमन गर्नुपर्ने उहाँको भनाइ थियो ।
