धनगढी । नेकपा (माओवादी केन्द्र) का अध्यक्ष पुष्पकमल दाहाल प्रचण्डले सत्ता गठबन्धनमा प्रतिनिधिसभाको आयु नलम्ब्याउनेबारे सहमति भएको बताउनुभएको छ ।
सरकारले केही नेपाल ऐन संशोधन गर्ने विधेयक, २०८९ मार्फत प्रतिनिधिसभाको आयु थप्न खोजेको थियो । यसको चौतर्फी आलोचना भएको थियो । निर्वाचन आयोगले समेत सरकारको सो कदमप्रति असहमति जनाइसकेको छ ।
धनगढीमा बोल्दै अध्यक्ष प्रचण्डले आज बस्ने प्रतिनिधिसभाको बैठकमा प्रतिनिधिसभाको आयु थप्ने प्रस्ताव फिर्ता हुने जानकारी दिनुभयो ।
“आयु लम्ब्याउन हुँदैन भनेर गठबन्धनमा बसेर छलफल भएको छ । एकदिन पनि यताउता गर्नु हुँदैन”, उहाँले भन्नुभयो, “मंसिर ४ गते चुनाव हुन्छ । मनोनयनपछि संसद् रहँदैन । एकदम क्लियर छ त्यहाँ द्वविधा हुनै पर्दैन ।”
केही प्राविधिक कारणले प्रतिनिधिसभाको समयावधि थप्न खोजिए पनि निर्वाचनअघि द्विविधा पार्न नहुनेमा गठबन्धन दलहरुबीच सहमति भएको उहाँको भनाइ थियो ।
