सुर्खेत । नेकपा (माओवादी केन्द्र)का अध्यक्ष पार्टीभित्र गुटबन्दी हुँदा स्थानीय तहको निर्वाचनमा अपेक्षित परिणाम नआएको बताउनुभएको छ ।
सुर्खेतमा शुक्रबार आयोजित कर्णाली प्रदेशस्तरीय प्रशिक्षण कार्यक्रममा उहाँले पार्टीमा विचार समूह र नेतृत्वमा कसैको विमति नरहे पनि थुप्रै गुट भएको बताउनुभयो । उहाँले गुटबन्दी कार्यकर्तास्तरमा नभई नेताहरुमा देखिएको र त्यो नेताहरुको बोलीले नै स्पष्ट हुने बताउनुभयो ।
अध्यक्ष प्रचण्डले पार्टीभित्रको गुटबन्दीका कारण स्थानीय तहको निर्वाचनमा आन्तरिक व्यवस्थापन गर्न नसकिएको स्वीकार गर्नुभयो । उहाँले स्थानीय तहको निर्वाचनमा १७५ पालिका जित्ने आकलन गरिएको भए पनि आन्तरिक व्यवस्थापन गर्न नसक्दा १२२ पालिकामा पार्टी खुम्चिएको उल्लेख गर्नुभयो ।
उहाँले पार्टीका नेताहरुमा बोलीमा प्रचण्डलाई आफ्नो नेता मान्ने तर व्यवहारमा चाहिँ प्रचण्डभन्दा ठूलो नेता त मै हुँ नि भने जस्तो गर्ने देखिएको बताउनुभयो ।
उहाँले भन्नुभयो, “नेताहरुबीच बोलचाल छैन, गुटबन्दीका कारण कार्यकर्ता पनि विभाजित भएका छन् ।” उहाँका अनुसार आफ्नो गुटमा नलागेको व्यक्तिलाई हराउनु बहादुरी ठान्ने गुटबन्दी, स्वार्थ समूह र व्यक्तिवादलाई रोक्न चुनौती छ ।
यस्तो गुटबन्दीबाट बेलाबेला आफू हैरान हुने गरेको उहाँको भनाइ थियो ।
