काठमाडौँ । निलम्बित प्रधानन्यायाधीश चोलेन्द्रशम्शेर जबराले महाअभियोग सिफारिस समितिले आफूलाई सोधेका प्रश्नहरु औचित्यहीन भएको बताउनुभएको छ । उहाँले महाअभियोग सिफारिस समिति र संसद्माथि नै प्रश्न गर्नुभएको छ ।
बयान दिन दोस्रो दिन बिहीबार सिंहदरबार पुग्नुभएका जबराले समितिले प्रधानन्यायाधीश असक्षम र पूर्णतः विफल हुन पुगेको भनी लगाएको आरोपका विषयमा सोधिएको प्रश्नमा यसको कुनै औचित्य नभएको बताउनुभयो ।
जवाफ दिने क्रममा उहाँले समितिको प्रश्नमाथि नै प्रश्न गर्नुभएको थियो । समितिको प्रश्नमाथि नै प्रश्न गर्न थालेपछि समिति सदस्य कल्याणी खड्काले विरोध गर्नुभएको थियो । त्यसपछि जबराले संवैधानिक र तत्कालीन प्रमाणबारे बोलेको भन्दै आफूलाई असक्षम भनी लगाएको आरोप गलत भएको बताउनुभयो ।
जबराले महाअभियोग प्रस्ताव गर्नेहरु नै समितिमा बस्न मिल्छ कि मिल्दैन भनी प्रश्न गर्नुभएको थियो । बिहीबार बैठकमा जबरालाई भ्रष्टाचारमा मुछिएको, शक्ति सन्तुलन कायम गर्न नसकेको र भ्रष्टाचार केन्द्रित भएर न्याय सम्पादन गरेको आरोपबारे प्रश्नहरु सोधिएको थियो । जबरामाथिको आजको बयान सकिएको छ ।
