काठमाडौँ । नेकपा (एकीकृत समाजवादी)छोडेर नेकपा (एमाले)मा फर्किने घोषणा गरेका तारा लामा तामाङलाई एकीकृत समाजवादीले कारबाहीका लागि सिफारिस गरेको छ ।
एकीकृत समाजवादीका केन्द्रीय सदस्य तथा सुदूरपश्चिम प्रदेश कमिटीका उपसचिव तामाङले सोमबार प्रदेशसभामा विशेष समय माग गर्दै एमालेमा फिर्ता हुने घोषणा गरेका थिए ।
एकीकृत समाजवादीका प्रदेश अध्यक्ष हर्कबहादुर सिंहले विज्ञप्ती जारी गर्दै पार्टीको अनुशासान र मर्यादाविपरीत वैधानिक व्यवस्थाविरूद्ध संसद् बैठक तथा सार्वजनिक स्थानमा अभिव्यक्ति दिएको भन्दै कारबाहीका लागि सिफारिस गरिएको जनाएका छन् ।
तामाङलाई साधारण सदस्यसमेत नरहने गरी अनुशासनको कारबाही गर्न सिफारिस गरिएको जनाइएको छ भने उनलाई प्रदेशसभा सदस्यको पदबाट पनि कारबाही गर्न संसदीय दललाई निर्देशन दिइएको छ ।
तामाङ एमाले विघटनपछि नेकपा (एकीकृत समाजवादी)मा गएका थिए । तामाङ सुदूरपश्चिम प्रदेशमा ६ महिनाअघि आर्थिक मामिला तथा योजनामन्त्री समेत भएका थिए ।
