काठमाडौँ । राष्ट्रियसभाको बैठक आज अपराह्न १ बजे बस्दैछ । आजको बैठकमा राष्ट्रपति विद्यादेवी भण्डारीले १५ बुँदे सन्देशसहित पुनर्विचार गर्न फिर्ता पठाएको नागरिकता विधेयकबारे जानकारी गराइने छ ।
राष्ट्रियसभाका सचिव राजेन्द्र फुयाँलले राष्ट्रपतिबाट पुनर्विचारका लागि फिर्ता भएको ‘नेपाल नागरिकता (पहिलो संशोधन) विधेयक, २०७९ का सम्बन्धमा प्रतिनिधिसभाबाट प्राप्त सन्देश जानकारी गराउने बैठकको सम्भावित कार्यसूची छ ।
यसअघि गत साउन १५ गते संघीय संसद्का दुवै सदनबाट पारित भई नागरिकता विधेयक प्रमाणीकरणका लागि राष्ट्रपतिका पुगेको थियो । राष्ट्रपतिले पुनर्विचार गर्न सो विधेय पुनः प्रतिनिधिसभामै फिर्ता पठाउनुभएको थियो ।
फिर्ता भएको सो विधेयकलाई प्रतिनिधिसभाको बैठकले यही भदौ २ गते हुबहु पारित गरेको छ । पारित भएको सो विधेयकबारे आज राष्ट्रियसभाको बैठकमा जानकारी गराउन लागिएको हो ।
राष्ट्रियसभाबाट पनि सो विधेयक हुबहु पारित भएको खण्डमा प्रमाणीकरणमा राष्ट्रपतिकहाँ पुगेको १५ दिनभित्र राष्ट्रपतिले प्रमाणीकरण गर्नुपर्ने संवैधानिक व्यवस्था छ । उहाँले दुवै सदनबाट पुनः पारित भएर आएको विधेयकलाई फेरि पुनर्विचार गर्नका लागि संसद्मै फिर्ता पठाउन सक्ने अधिकार छैन ।
