काठमाडौँ । सत्ता गठबन्धनको बिहीबार प्रधानमन्त्री निवास बालुवाटारमा बसेको बैठकमा राष्ट्रपति विद्यादेवी भण्डारीले केही दिन यता गरिरहेका भेटघाट र गतिविधिबारे छलफल भएको छ ।
बैठक आगामी निर्वाचनमा गठबन्धन दल सिट बाँडफाँटको विषयमा सहमति जुटाउन बसेको भए पनि राष्ट्रपति भण्डारीले गरिरहेका भेटघाट र सम्भावित कदमहरुबारे छलफल भएको बताइएको छ ।
बैठकमा सत्ता साझेदार दलका नेताहरुले राष्ट्रपतिको पछिल्ला केही दिनदेखिका कदम ‘अस्वाभाविक’ भएको टिप्पणी गरेका छन् । उनीहरुले नागरिकता विधेयकमा नेकपा (एमाले) ले राखेको मतलाई सहयोग पुग्ने गरी राष्ट्रपतिले गतिविधि गरिरहेको बताएका छन् । नेताहरुले यस्तो गतिविधिलाई अस्वाभाविक र स्वार्थपूर्ण भनेका छन् ।
बैठकमा जनता समाजवादी पार्टी (जसपा) का अध्यक्ष उपेन्द्र यादवले राष्ट्रपति भण्डारीको सक्रियता, राजीनामा दिने भन्ने जस्ता आएका समाचारप्रति प्रश्न गर्नुभएको थियो । त्यसपछि प्रधानमन्त्री शेरबहादुर देउवाले पनि राष्ट्रपतिको पछिल्ला कदमहरुबारे चासो राख्नुभएको थियो ।
बैठकमै राष्ट्रपतिका बारेमा कुरा उठेपछि प्रधानमन्त्री देउवाले राष्ट्रपतिले को कोसँग छलफल गर्नुभयो, के के गर्नुभयो भनेर जानकारी लिनुभएको थियो । नेकपा (माओवादी केन्द्र) का अध्यक्ष पुष्पकमल दाहाल प्रचण्डले राष्ट्रपति भण्डारीको पछिल्लो कदम अस्वाभाविक रहेको बताउनुभयो ।
संसद्का दुवै सदनबाट पारित भई प्रमाणीकरणका लागि राष्ट्रपतिकहाँ पठाइएको नागरिकता ऐन संशोधन विधेयक राष्ट्रपतिले पुनर्विचार गर्न संसद्मै फर्काउनुभएको थियो । तर गठबन्धन दलले त्यही विधेयकलाई हुबहु पारित गर्ने निर्णय गरेपछि प्रतिनिधिसभाको बैठकले भदौ २ गते दोस्रोपटक बहुमतले पारित गरेको थियो ।
प्रमुख प्रतिपक्ष एमालेले नागरिकता विधेयकमा केही विषयमा असहमति जनाउँदै विरोध गरेको छ । सत्ता गठबन्धनका नेताहरुले एमालेकै उक्साहटमा राष्ट्रपति भण्डारीले अस्वाभाविक गतिविधि गर्न थालेको बताएका छन् ।
