काठमाडौँ । नेकपा (माओवादी केन्द्र) र नेकपा (एकीकृत समाजवादी) आसन्न निर्वाचनमा एउटै चुनावी घोषणापत्रमार्फत लड्न सहमत भएका छन् ।
दुवै दल पार्टी एकताका लागि संयोजन समिति बनाउन सहमत भएपछि आगामी मंसिर ४ गते हुने प्रतिनिधिसभा सदस्य र प्रदेशसभा सदस्य निर्वाचनमा एउटै घोषणापत्र बनाएर उम्मेदवारी दिन लागेका हुन् ।
एकीकृत समाजवादीले एकता समायोजन समिति बनाउने निर्णय गरेर पहिलोपटक माओवादी केन्द्रसँग वार्ता गरेको थियो । हात्तीवनस्थित एक घरमा भएको भेटमा माओवादी केन्द्रका अध्यक्ष पुष्पकमल दाहाल प्रचण्ड र एकीकृत समाजवादी पार्टीका अध्यक्ष माधवकुमार नेपालबीच पार्टी एकता संयोजन समिति बनाउने सहमति भएको बताइएको छ ।
भेटमा माओवादी केन्द्रका वरिष्ठ उपाध्यक्ष नारायणकाजी श्रेष्ठ र एकीकृत समाजवादीका महासचिव डा बेदुराम भुसाल पनि सहभागी भएको बताइएको छ ।
विसं २०७४ मा नेकपा (एमाले) र माओवादी केन्द्रले पनि एउटै चुनावी घोषणापत्र बनाएर उम्मेदवारी दिएका थिए ।
