पोखरा । नेकपा (एमाले) का उपाध्यक्ष सुरेन्द्र पाण्डेले आसन्न निर्वाचनको बेला एमाले कठिन परिस्थितिमा रहेको बताउनुभएको छ । प्रेस चौतारी कास्कीले आज पोखरामा गरेको पत्रकार सम्मेलनमा उहाँले २०५६ निर्वाचनमा जस्तै अहिले पार्टी अप्ठ्यारो परिस्थितिमा रहेको बताउनुभयो ।
यद्यपि उहाँले निर्वाचनका लागि एमाले तयार रहेको उल्लेख गर्नुभयो । उहाँले २०५६ को निर्वाचनमा पार्टी विभाजित भए पनि एमाले विरुद्ध कसैको गठबन्धन थिएन भन्दै भन्नुभयो, “अहिले हाम्रासामु विभाजनको अवस्थाका साथै हामीविरुद्ध गठबन्धन पनि गर्ने दुई चुनौती छन्, यी दुवै चुनौतीलाई हामीले गम्भीरताका साथ विश्लेषण गरेका छौँ ।”
नेकपा विभाजनसँगै एमालेभित्र पनि विभाजन भएको र विभाजन भएको त्यो सानै हिस्साले पनि विभाजनको छाप छाडेर जनतामा प्रभाव पारेको उहाँको भनाइ थियो ।
गठबन्धनले मुलुकलाई थप संकटतिर लान सक्ने भन्दै उपाध्यक्ष पाण्डेले अहिलेको गठबन्धन मुलुकका निम्ति आफैँ समस्या बन्न सक्ने बताउनुभयो ।
