जनकपुरधाम । मधेश प्रदेशका मुख्यमन्त्री र मन्त्री नै संघीय सरकारविरुद्ध धर्ना बसेका छन् । संघीय सरकारले प्रहरी समायोजन नगरेको भन्दै उनीहरु आइतबारदेखि धर्ना बसेका हुन् । मुख्यमन्त्री लालबहादुर राउतको नेतृत्वमा मधेश भवनभित्रको प्रदेश प्रमुख कार्यालय प्राङ्गणभित्र उनीहरु धर्नामा बसेका हुन् । धर्नामा मुख्यमन्त्री राउतसागै भौतिक पूर्वाधार विकासमन्त्री रामसरोज यादव, गृह तथा सञ्चारमन्त्री भरत साह, राज्यमन्त्री रुबी कर्ण, खानेपानी तथा ऊर्जामन्त्री ओमप्रकाश शर्मा रहेका छन् ।
प्रदेश सरकारहरुले प्रहरी समायोजन गरी प्रदेश सरकारलाई हस्तान्तरण गर्न संघीय सरकारलाई आग्रह गर्दै आएका छन् । यस सम्बन्धमा मधेश प्रदेश सरकारले प्रधानमन्त्री शेरबहादुर देउवालाई समेत भेट गरेर प्रहरी समायोजन गरी प्रदेश सरकारलाई हस्तान्तरण गर्न आग्रह गरेको थियो । प्रहरी समायोजन नगरे आन्दोलनको अल्टिमेटम दिएर ज्ञापनपत्र पठाउँदा समेत संघीय सरकारले ध्यान नदिएको भन्दै प्रदेश सरकारले पहिलो चरणको आन्दोलनको घोषणा गरेको हो ।
आन्दोलनअन्तर्गत धर्ना कार्यक्रम आइतबारदेखि एक सातासम्म दैनिक दुई घण्टा हुनेछ । मधेश प्रदेशका गृह तथा सञ्चारमन्त्री साहले शनिबार पत्रकार सम्मेलन गरी आन्दोलनका कार्यक्रम सार्वजनिक गरेका थिए । एक साताभित्र पनि प्रहरी समायोजन नभए अर्को चरणको कार्यक्रम सार्वजनिक गरिने उनले बताए ।
