काठमाडौँ । उच्च अदालत सुर्खेतको निर्देशनात्मक आदेशको बेवास्ता गर्दै कर्णाली प्रदेशका नवनियुक्त मन्त्री वीरबहादुर शाहीले पद तथा गोपनीयताको शपथ ग्रहण गरेका छन् । प्रदेश प्रमुख तिलक परियारले आइतबार नवनियुक्त मन्त्री शाहीलाई पद तथा गोपनीयताको शपथ खुवाउनुभएको हो ।
नेकपा (माओवादी केन्द्र) का प्रदेशसभा सदस्य शाहीलाई यही साउन २६ गते मुख्यमन्त्री जीवनबहादुर शाहीले प्रदेश सरकारको उद्योग, पर्यटन, वन तथा वातावरण मन्त्रीमा नियुक्त गर्नुभएको थियो । मन्त्रिपरिषद् समावेशी नभएको भन्दै उच्च अदालत सुर्खेतले निर्देशनात्मक आदेश दिएपछि यसअघि तय भएको उनको शपथ कार्यक्रम रोकिएको थियो । तर प्रदेश प्रमुखको कार्यालयले उच्च अदालत सुर्खेतको निर्देशनात्मक आदेशको बेवास्ता गर्दै मन्त्री शाहीलाई शपथ खुवाएको छ ।
उच्च अदालतले मन्त्रिपरिषद् पुनर्गठन गर्दा समावेशी सिद्धान्तलाई ध्यान पुर्याउन उच्च अदालतले निर्देशनात्मक आदेश दिएको थियो । वीर बहादुर शाहीलाई मन्त्री नियुक्त गर्दा महिलाको प्रतिनिधित्व नभएको गुनासो आएको थियो । उनको नियुक्तिले महिलाको प्रतिनिधित्व नभएको भन्दै प्रदेशसभा सदस्य र अधिकारकर्मीहरुले समेत आपत्ति जनाएका थिए । यसअघि उद्योग, पर्यटन, वन तथा वातावरणमन्त्री रहेका गैरसांसद कार्चेन लामाको छ महिने कार्यकाल सकिएपछि डोल्पाबाट निर्वाचित प्रदेशसभा सदस्य शाहीलाई मन्त्री बनाइएको हो ।
