काठमाडौँ । आगामी मंसिर ४ गते हुने प्रतिनिधिसभा र प्रदेशसभाको निर्वाचनका लागि छलफल गर्न प्रमुख प्रतिपक्षी दल नेकपा (एमाले) ले विभिन्न पार्टी कमिटीको बैठक बोलाउने भएको छ ।
एमालेले आगामी भदौ १५ गतेभित्र पार्टी कमिटीका सबै बैठक सकेर चुनावी कार्ययोजनासहितको रणनीति तय गर्न केन्द्रीय सचिवालय, स्थायी कमिटी, पोलिटब्यूरो कमिटी र केन्द्रीय कमिटीको बैठक बोलाउने भएको हो ।
सबैभन्दा पहिला केन्द्रीय कार्यालयको बैठक बस्ने र सो बैठकले सचिवालय बैठक बोलाउने बताइएको छ । सचिवालय बैठकले स्थायी कमिटी, स्थायी कमिटीले पोलिटब्यूरो कमिटी र पोलिटब्यूरो कमिटीले केन्द्रीय कमिटीको बैठक बोलाउने छ ।
ती बैठकबाट आसन्न निर्वाचनलाई केन्द्रविन्दु बनाएर कार्यक्रम र कार्ययोजना बनाइने बताइएको छ । आज बुधबार सम्भवतः केन्द्रीय कार्यालयको बैठक बस्ने र बिहीबार सचिवालयको बैठक बस्नेछ ।
