पर्वत । पर्वतका विभिन्न ठाउँमा पहिराले पुरिँदा ६ जनाको मृत्यु भएको छ भने २ जना पुरिएर बेपत्ता भएका छन् ।
बिहीवार रातिको भीषण वर्षापछि पहिरो जाँदा कुश्मा नगरपालिका–३ दुर्लुङमा पहिरोमा पुरिएका एकै घरका पाँच जनामध्ये तिन जनाको मृत्यु भएको छ भने दुइ जना पुरिएर बेपत्ता भएका छन् ।
पर्वतका प्रहरी नायब उपरीक्षक शिवराज बुढाथोकीका अनुसार पहिरोमा परि मुत्यु हुनेमा १५ वर्षीया विमला पौडेल, ११ वर्षीया विनिता पौडेल र ७५ वर्षीया कौशल्या पौडेल रहेका छन् भने सोही परिवारका भगवती पौडेल र उनका छोरा विनोद बेपत्ता छन् ।
यस्तै कुश्मा नगरपालिका ११ पकुवामा पनि पहिरोमा पुरिएर आमा छोराको मृत्यु भएको छ । मृत्यु हुनेमा ३५ वर्षीय दुर्गा पौडेल र उनका ६ वर्षका छोरा गणेश रहेका छन् ।
यस्तै मोदी गाउँपालिका ५ अम्बोटमा पहिरोमा पुरिएर ५० वर्षीय ठुलीमाया थापाको पनि मृत्यु भएको पर्वत प्रहरीले जनाएको छ ।
