काठमाडौँ । जहाजको एक इन्जिनमा समस्या देखिएपछि पोखराबाट काठाडौँतर्फ उडेको यती एयरलाइन्सको जहाजलाई छ मिनेटमै पोखरा फर्काइएको छ । यती एयरलाइन्सको ६७२ उडान नम्बरको एटीआर ७२ जहाज आज बिहान पोखराबाट काठमाडौँतर्फ उडेको थियो । तर जहाजको बायाँ इन्जिनमा समस्या देखिएपछि पाइलटले छ मिनेटभित्रै पोखरा फर्काएका हुन् ।
एयरलाइन्सका प्रवक्ता सुदर्शन बर्तौलाका अनुसार जहाजको इन्डिकेटरले बायाँ इन्जिनमा ‘रेड लाइट’ को संकेत देखाएको थियो । पाइलटले यस्तो अवस्थामा जोखिम लिन नचाहेपछि विमानलाई पोखरा नै फर्काएका हुन् ।
विमानमा ४५ जना यात्रु रहेको बताइएको छ ।
