काठमाडौँ । राष्ट्रिय प्रजातन्त्र पार्टी (राप्रपा) का चार नेताले पार्टी परित्याग गरेका छन् । नेताहरु दिलनाथ गिरी, श्याम तिमल्सिना, केशवराज श्रेष्ठ र दिलविकास राजभण्डारीले आज एक संयुक्त विज्ञप्ति जारी गर्दै पार्टी परित्याग गरेको घोषणा गरेका हुन् ।
यो पनि पढ्नुहोस – राप्रपाका चार नेतालाई २४ घण्टे स्पष्टीकरण
पार्टीभित्र आन्तरिक प्रजातन्त्रको चिरहरण भएको अवस्थामा सर्वसत्तावाद र अहंकार मौलाएको, विधि विधानको धज्जी उडिरहेको अवस्थामा अपमानित र निरीह भएर पार्टीभित्र बस्ने सक्ने अवस्था नभएको भन्दै उनीहरुले पार्टी परित्याग गरेका हुन् ।
आगामी संघीय निर्वाचनमा पार्टीलाई वैकल्पिक शक्तिका रुपमा स्थापित गर्न बाहिर छरिएर रहेका राष्ट्रवादी, प्रजातन्त्रप्रेमी व्यक्ति, समूह र पार्टीलाई एउटै धारमा खडा गरी राप्रपालाई मूलधार बनाउन फराकिलो र सकारात्मक सोचका साथ संवादको वातावरण निर्माण गर्न खोज्दा पार्टी नेतृत्वले अप्रजातान्त्रिक र निर्मम ढंगले तल्लोस्तरको लाञ्छना लगाउँदै अपमानित गर्ने दुष्प्रयास गरेको विज्ञप्तिमा उल्लेख छ ।
पार्टी नेतृत्वले गरेको दुष्प्रयास एउटा विधि, पद्धति र प्रणालीमा विश्वास गर्ने स्वाभिमानीका निमित्त स्वीकार्य नभएको भन्दै उनीहरुले आजैका मितिदेखि साधारण सदस्यसमते नरहने गरी पार्टीबाट अलग भएको घोषणा गरेका छन् ।
