काठमाडौँ । जनता समाजवादी पार्टी (जसपा) को संस्थापन पक्षले आगामी संघीय र प्रदेशसभा निर्वाचनसम्म सत्ता साझेदार गठबन्धनलाई कायमै राख्ने निर्णय गरेको छ ।
वीरगञ्जमा सम्पन्न भएको जसपाको केन्द्रीय कार्यकारिणी र केन्द्रीय समितिको बैठकले लोकतन्त्रको रक्षा गरी मुलुकलाई राजनीतिक स्थिरतातर्फ अगाडि लैजान गठबन्धनलाई निरन्तरता दिने निर्णय गरेको पार्टी अध्यक्ष उपेन्द्र यादवले बताउनुभयो ।
अध्यक्ष यादवले प्रतिगनमनलाई परास्त गर्न निर्माण भएको पाँच दलीय गठबन्धन आफ्नो उद्देश्यमा सफल भएको उल्लेख गर्दै स्थानीय तहको निर्वाचनमा पार्टीका लागि केही अनपेक्षित अनुभव भए पनि मुलुकका लागि गठबन्धन अझै आवश्यक भएको बताउनुभयो ।
बैठकले पार्टी हितविपरीत काम गरेको भन्दै डा बाबुराम भट्टराईसहित ९ जनालाई कारबाही गरेको छ । भट्टराई पक्षले पार्टीको छुट्टै बैठक बोलाई पार्टी पुनरगठन गर्ने निर्णय गरेका थिए । यद्यपि अध्यक्ष यादवले पार्टीमा अझै पनि आफूहरुसँग दुई तिहाइ बहुमत रहेको दाबी गरेका छन् ।
