काठमाडौं । नेकपा एमालेका स्थायी कमिटी सदस्य एवं अर्थ तथा योजना विभागका प्रमुख घनश्याम भुसालले आफ्नो विभागमा उल्लेखित एम अधिकारी राष्ट्र बैंकका गभर्नर नरहेको बताएका छन् ।
आफू प्रमुख रहेको विभागको सदस्यमा रहेका खोटाङका एम अधिकारी राष्ट्र वैंकका गभर्नर महाप्रसाद अधिकारी भनी सत्तापक्षबाट प्रचार भएपछि उनले सार्वजनिक रूपमा उक्त स्पष्टीकरण दिएका हुन् ।
अधिकारी स्वयंले आफू कुनै पार्टी राजनीतिमा नरहेको र उक्त व्यक्ति आफू नभएको स्पष्ट पारिसकेको बताउँदै सार्वजनिक पदमा भएका व्यक्ति एमालेको कमिटी र विभागमा रहने व्यवस्था नरहेको समेत उल्लेख गरेका छन् ।
भुसालले फेसबुकमा लेखेका छन् –
म प्रमुख रहेको नेकपा (एमाले), अर्थ तथा योजना विभागमा गभर्नर महाप्रसाद अधिकारीको संलग्नता बारे मसँग समेत धेरै जनाले चासो र जिज्ञासा राख्नुभएको छ ।
प्रथमतस्, स्वयम् गभर्नर महाप्रसाद अधिकारीले कुनै पार्टी राजनीतिमा आफ्नो संलग्नता नरहेको र उक्त व्यक्ति पनि आफु नभएको’ स्पष्ट पारिसक्नुभएको छ।
दोस्रो, हाम्रा कमिटी र विभागहरुमा त्यस्ता सार्वजनिक पद धारण गरेका व्यक्तिहरु रहने वैधानिक व्यवस्था पनि नभएको कुरा जानकारी गराउन चाहान्छु ।
