काठमाडौँ । जनता समाजवादी पार्टी (जसपा) का संघीय परिषद् अध्यक्ष डा. बाबुराम भट्टराईले बोलाएको आफ्नो पक्षको केन्द्रीय समितिको विस्तारित बैठका दुई विकल्प अघि सारिएको छ ।
मंगलबार काठमाडौँको जडीबुटीस्थित एक ब्याङ्क्वेटमा भएको बैठकमा अध्यक्ष भट्टराईले नयाँ पार्टी बनाउने कि विचार मिल्नेसँग एकीकरण गर्ने भन्ने दुई विकल्प अघि सार्नुभएको हो ।
भट्टराईले राजनीतिक प्रतिवेदन प्रस्तुत गर्नुभएको छ । उहाँले जसपाको वैधानिक बहमुत आफूहरुसँग रहन्छ वा रहँदैन भन्ने कुरा निर्वाचन आयोगको प्रक्रियाले टुंगो लाग्ने भन्दै पार्टी पुनर्गठन भने अनिवार्य भएको बताउनुभयो ।
पार्टी पुनर्गठन गर्नका लागि उहाँले दुई विकल्प अघि सार्नुभएको बताइएको छ । पहिलो विकल्पमा नयाँ ढंगले वैकल्पिक राजनीतिक शक्तिको निर्माण अभियानलाई अघि बढाउने र दोस्रो विकल्पमा विचार, नीति र कार्यक्रम मिल्ने निकटतम शक्तिहरुसँग सहकार्य, ध्रुवीकरण र एकीकरण गर्ने भन्ने रहेको छ ।
दुई विकल्पमध्ये बैठकले उत्तम विकल्पको छनोट गरेपछि पुनर्गठित पार्टीको घोषणापत्र, विधान, नियमावली आदि बनाइने भट्टराईले बताउनुभयो ।
