काठमाडौँ। सरकारले ल्याएको नागरिकता विधेयकमा तीन सांसदले विरोधको सूचना दर्ता गरेका छन् । नेकपा (एमाले)का शेरबहादुर तामाङ र भीम रावल तथा नेपाल मजदुर किसान पार्टी (नेमकिपा)का प्रेम सुवालले विरोधको सूचना दर्ता गरेका हुन् ।
एमाले सांसद रावलले राज्य व्यवस्था समितिकै अवहेलना गरेर पुनः विधेयक ल्याएको बताएका छन् । उनले व्यापक छलफल गरेर प्रतिवेदन पेश गरिसकेको अवस्थामा विधयेक फिर्ता लिएर नयाँ ल्याउनु जायन नभएको तर्क गरे ।
अर्का सांसद तामाङले लैंगिक पहिचानसहित आमा वा बाबुको नामबाट नागरिकता प्राप्त गर्ने मर्म विपरित भएको भन्दै विरोधको सूचना दर्ता गराएको बताए ।
सांसद सुवालले संघ र प्रदेशको अलग अलग नेपाली नागरिकताको व्यवस्था गर्नुपर्ने माग राख्दै विरोधको सूचना दर्ता गराएका हुन् । उनले खुला सीमा नियमन गर्नुपर्ने पनि माग गरेका छन् ।
सरकारले ल्याएको विधेयकमाथि संसदमा सैद्धान्तिक छलफल गर्नुअघि सांसदहरुले विरोधको सूचना दर्ता गर्न सक्ने व्यवस्था छ ।
