काठमाडौँ । चितवनको पटिहानीमा रहेको रिभरसाइड रोयल गार्डेन रिसोर्ट अब ‘सोल्टी वेस्टेन्ड रिसार्ट चितवन’ को नामबाट सञ्चालन हुने भएको छ ।
भरतपुर महानगरपालिका–२२ मा निर्माण सम्पन्न भएको सो रिसोर्टलाई सोल्टी होटलले व्यवस्थापन गर्ने भएपछि रिसोर्टको पनि नाम परिवर्तन गरिएको हो । रिसोर्टका अध्यक्ष कल्याण जोशी र सोल्टी होटलका उपाध्यक्ष सुदर्शन चापागाईंले सोसम्बन्धी सम्झौतामा हस्ताक्षर गरेका छन् ।
सो रिसोर्टमा अहिलेसम्म एक अर्ब रुपैयाँ लगानी भइसकेको बताइएको छ । कूल पाँच बिघा क्षेत्रफलमा फैलिएको रिसोर्टमा ४० वटा कोठा र १२ भिल्ला रहेका छन् । लग्जरी रिसोर्ट आवश्यकता पूरा गर्ने यो रिसोर्टमा अतिथिलाई सम्पूर्ण सेवा उपलब्ध हुने बताइएको छ । रिसोर्टमा स्विमिङ पुलको पनि व्यवस्था छ ।
सात वटै प्रदेशमा आफ्नो सेवा विस्तार गरिरहेको सोल्टी होटलले व्यवस्थापनका माध्यमबाट चितवनमा सेवा सुरु गरेको हो । उसको नेपालगञ्चमा आफ्नै पाँचतारे होटल पनि छ ।
सन् २०१७ देखि निर्माण सुरु भएको सो रिसोर्टलाई आगामी साउन ३० गतेबाट सञ्चालनमा ल्याइने बताइएको छ ।
