काठमाडौँ । नेकपा (माओवादी केन्द्र) का अध्यक्ष पुष्पकमल दाहाल प्रचण्डले अर्थमन्त्री जनार्दन शर्माले पदबाट राजीनामा दिएर गठबन्धनलाई असफल पार्ने षड्यन्त्रलाई जवाफ दिएको बताउनुभएको छ ।
माओवादी केन्द्रको केन्द्रीय समितिको बैठकमा आज उहाँले आफूले कुनै गल्ती गरेको छैन भन्दै आउनुभएका अर्थमन्त्री शर्माले संसद्मा कुरा उठेपछि आफ्ना कुरा प्रष्टसँग राखेर नैतिकता देखाउनुभएको बताउनुभयो ।
अध्यक्ष प्रचण्डले अर्थमन्त्रीले नैतिकता प्रदर्शन नगर्नुभएको भए त्यही विषयलाई भ्रमित बनाउँदै र उछाल्दै राजनीतिसँगै सत्ता गठबन्धलाई अप्ठ्यारोमा पार्ने डिजाइन बनाइएको बताउनुभयो ।
सत्ता गठबन्धनलाई अप्ठ्यारोमा पार्नका लागि अर्थमन्त्रीको विषय अगाडि ल्याइएको उहाँको भनाइ थियो । “त्यस्तो डिजाइनलाई अर्थमन्त्रीको त्यागले जवाफ दिइएको छ, पार्टीले यसबारे कार्यकर्ता र जनतालाई बुझाउनुपर्छ ।”
बजेट प्रकरणमा गठन भएको संसदीय छानबिन समितिलाई सहयोग पुगोस् भन्ने उद्देश्यले अर्थमन्त्री शर्माले नैतिकता प्रदर्शन गरेको भन्दै अध्यक्ष प्रचण्डले यसले राम्रो राजनीतिक संस्कार देखाएको बताउनुभयो ।
आगामी आर्थिक वर्षको बजेट निर्माण सन्दर्भमा अर्थमन्त्री शर्मामाथि बजेट प्रस्तुत हुनुभन्दा अघिल्लो दिन अनधिकृत व्यक्तिलाई संलग्नता गराई करका दर हेरफेर गरेको र सोसम्बन्धी सिसिटिभी फुटेज नष्ट गरेको आरोप लागेपछि उनले अर्थमन्त्रीबाट राजीनामा दिएका थिए ।
