काठमाडौँ । प्रमुख प्रतिपक्षी नेकपा (एमाले) ले बजेट निर्माण प्रक्रियामा विवादित बनेका अर्थमन्त्री जनार्दन शर्माले राजीनामा दिएपछि मात्र छानबिन समिति गठन गर्नुपर्ने शर्त राखेको छ ।
बजेट निर्माणमा अनधिकृत व्यक्तिलाई अर्थमन्त्री शर्माले संलग्न गराएको भन्दै एमालेले उनको राजीनामा माग्दै आएको छ । सुरुमा एमालेले संसदीय छानबिन समिति गठन गर्नुपर्ने माग राखे पनि त्यस्तो समिति गठन गर्न सत्ता साझेदार दलहरु तयार भएका थिएनन् ।
तर अहिले सत्तारुढ दलहरुले संसदीय छानबिन समिति गठन गर्न तयार भएको बताएका छन् । प्रमुख प्रतिपक्षी दल एमालेले भने छानबिन समिति गठन हुनुपूर्व अर्थमन्त्रीको राजीनामा आउनुपर्ने माग गरेका छन् ।
खासगरी बजेट निर्माणमा अनधिकृत व्यक्तिको संलग्नतासम्बन्धी सिसिटिभी फुटेज १३ दिनभन्दा बढी समयसम्म नरहने भन्दै अर्थ मन्त्रालयले जानकारी गराएपछि अर्थमन्त्रीमाथि राजीनामाको व्यापक दबाव परेको छ ।
सो सम्बन्धमा संसद्को बैठकमा अर्थमन्त्री शर्माले जवाफ दिने बताए पनि एमालेले राजीनामा नदिएसम्म उनलाई बोल्नै नदिने अडान राखेको छ । त्यसैले आज ११ बजे बस्ने भनिएको प्रतिनिधिसभाको बैठक बस्न नसकेर दिउँसो २ बजेसम्मका लागि स्थगित गरिएको छ । अझै पनि बैठक बस्ने हो वा होइन कुनै टुंगो लागेको छैन ।
