काठमाडौँ । अर्थमन्त्री जनार्दन शर्माले बजेट प्रकरणमा आफू निर्दोष रहेको बताउनुभएको छ । नेकपा (माओवादी केन्द्र) को आज बसेको पूर्व स्थायी कमिटी सदस्यहरुको बैठकमा उहाँले आफू निर्दोष रहेको बताउनुभएको हो । उहाँले सिसिटिभीमा रहेको फुटेज १३ दिनभन्दा बढी नरहने बताउनुभएको थियो ।
संसद्मा प्रमुख प्रतिपक्षी दल नेकपा (एमाले) ले बजेट निर्माण प्रक्रियामा अनधिकृत व्यक्तिलाई संलग्नता गराइएको भन्दै अर्थमन्त्रीको राजीनामा माग्दै आएको छ ।
माओवादी केन्द्रको पूर्व स्थायी कमिटीको बैठकले अर्थमन्त्री र अर्थ मन्त्रालयसँग सम्बन्धित विवादमा प्रमुख प्रतिपक्षी दल एमालेसँग छलफल गर्ने निर्णय गरेको छ । बैठकमा पार्टी अध्यक्ष पुष्पकमल दाहाल प्रचण्डले अर्थमन्त्रीमाथि उठेको प्रश्न गम्भीर रहेको भन्दै यसबारेमा चाँडो निष्कर्षमा पुग्नुपर्ने बताउनुभयो ।
