काठमाडौँ । अर्थमन्त्री जनार्दन शर्माले बजेट निर्माणमा अनधिकृत व्यत्तिलाई संलग्न गराएको भन्ने प्रकरणमा नेकपा (माओवादी केन्द्र) छानबिनका लागि संसदीय समिति बनाउन तयार भएको छ ।
अर्थमन्त्री शर्माले आजको संसद् बैठकमा आफ्ना कुरा राखेपछि संसदीय छानबिन समिति बनाउन माओवादी केन्द्र तयार देखिएको हो ।
यद्यपि प्रमुख प्रतिपक्षी नेकपा (एमाले) ले संसद् बैठकमा अर्थमन्त्री शर्मालाई बहिष्कार गर्दै आएको छ । त्यसैले माओवादी केन्द्रले छानबिन समिति गठन गर्नुअघि एमाले नेताहरुसँग छलफल गर्न चाहेको छ ।
माओवादी केन्द्रको आज बिहान बसेको पूर्व स्थायी कमिटीका नेताहरुको बैठकले एमालेसँग छलफल गरेर अगाडि बढ्ने निर्णय गरेको थियो ।
संसद्मा बजेट प्रस्तुत गर्नु अघिल्लो दिन अनधिकृत मान्छेलाई प्रवेश गराई करको दर हेरफेर गरेको भन्दै एमालेले अर्थमन्त्री शर्माको राजीनामा माग्दै आएको छ । साथै सो दिनको सिसिटिभी फुटेज नष्ट गरेको भन्दै अर्थमन्त्रीको चर्को आलोचना भएको छ ।
अर्थमन्त्रीलाई लिएर व्यापक आलोचना हुँदा पनि सरकार मौन बसेको भन्दै एमाले महासचिव शंकर पोखरेलले प्रधानमन्त्री पनि अर्थमन्त्रीको बदमासीमा मिलेमतोमा लाग्नुभएको आरोप लगाउनुभएको थियो ।
