काठमाडौँ । प्रमुख प्रतिपक्षी दल नेकपा (एमाले) का अध्यक्ष केपी शर्मा ओलीले अमेरिकाको स्टेट पार्टनरसीप प्रोग्राम (एसपीपी) लाई आफू प्रधानमन्त्री भएको बेला रोकेको बताउनुभएको छ ।
सोमबार प्रतिनिधिसभाको बैठकमा समय लिएर बोल्दै उहाँले एमसीसीको प्रतिवेदनमा एसपीपी इण्डो प्यासिफिकको अंग भएको र नेपाल त्यसमा सामेल भएको रिपोर्ट आएपछि २०७६ जेठमा आफूले त्यसलाई रोकेको बताउनुभयो ।
उहाँले तत्कालीन रक्षामन्त्रीले परराष्ट्रसचिवको संयोजकत्वमा गठन गरेको समितिले एसपीपीलाई तत्कालै स्टप गरेको उल्लेख गर्नुभयो । एसपीपी कुनै गठबन्धनको विषय नभई राष्ट्रको विषय हो भन्दै उहाँले यसबारेमा तत्कालीन सेनापतिलाई सोध्दा हुने बताउनुभयो ।
अध्यक्ष ओलीले एसपीपीका सन्दर्भमा कुनै भ्रमपूर्ण प्रचारबाजी गर्ने नभई सत्य तथ्य कुरा बाहिर ल्याउनुपर्छ भन्दै यो काम प्रधानमन्त्री शेरबहादुर देउवाले गर्नुहुन्छ भन्ने आफूले विश्वास गरेको बताउनुभयो ।
राष्ट्रिय स्वाधीनता र सार्वभौमिकताको विषय गाँसिएकाले यस विषयमा प्रधानमन्त्रीसँग उहाँले संसद् र जनतालाई यथार्थ जानकारी गराउन माग गर्नुभयो ।
पूर्वप्रधानमन्त्री ओलीले एसपीपीको विषय सन् २०१५ देखि सुरू भएको र सुशील कोइरालाका पालामा सुरू भएर पुष्पकमल दाहाल प्रचण्ड र शेरबहादुर देउवाका पालामा पत्राचार अघि बढेको जानकारी दिनुभयो ।
