काठमाडौँ । नेकपा (माओवादी केन्द्र) को केन्द्रीय समिति बैठक सुरु भएको छ । प्रज्ञा भवन कमलादीमा आइतबारदेखि सुरु भएको बैठकमा सपथग्रहण, बैठक सञ्चालन प्रक्रियाबारे अध्यक्षबाट जानकारी, प्रदेशहरुबाट संक्षिप्त रिपोर्टिङसहितका नौ एजेन्डामा छलफल हुने जनाइएको छ ।
तर एजेन्डामा एमसीसी विषय परेको छैन । संसद्बाट १२ बुँदे व्याख्यात्मक घोषणासहित एमसीसी अनुमोदन भएको थियो । माओवादी केन्द्रभित्र एमसीसीको खुलेर विरोध गर्ने नारायणकाजी श्रेष्ठसहितका नेताहरुले असन्तुष्टि व्यक्त गर्दै आएका छन् ।
एमसीसी अनुमोदन भएको समयमा नेता श्रेष्ठसहितका नेताहरुले छुट्टै पार्टी बनाउनेबारे छलफल गरेपछि पार्टी अध्यक्ष पुष्पकमल दाहाल प्रचण्डले स्थानीय तहको निर्वाचनपछि केन्द्रीय समितिको बैठक बोलाएर एमसीसीबारे बहस गर्ने सहमति गरेका थिए ।
साथै छलफलमा एमसीसीमाथि फरक मत आए तल्लो तहसम्म लगेर छलफल गर्ने सहमति बनेको थियो । तर आजदेखि सुरु भएको केन्द्रीय समितिको बैठकमा एमसीसीलाई अलि पछि छलफल गर्ने भन्दै पन्छाएको बताइएको छ ।
