काठमाडौँ । नेकपा (एमाले) संसदीय दलका नेता सुवासचन्द्र नेम्वाङले अमेरिकी स्टेट पार्टनरसीप प्रोग्राम (एसपीपी) सम्बन्धी सम्पूर्ण पत्र संसद्मा प्रस्तुत गर्न सरकारलाई आग्रह गर्नुभएको छ ।
संसद् दिवसका अवसरमा आयोजित कार्यक्रममा उहाँले एसपीपीसम्बन्धी सम्पूर्ण पत्र रक्षा मन्त्रालयमा रहेको उल्लेख गर्दै ती पत्रहरु संसद्मा प्रस्तुत गर्न प्रधानमन्त्री शेरबहादुर देउवासमक्ष आग्रह गर्नुभयो । उहाँका अनुसार अब यो विषयलाई त्यतिकै छाड्न नहुने बताउनुभयो ।
एसपीपी सम्बन्धमा विवाद उत्पन्न भएपछि तत्कालीन प्रधानसेनापतिले सन् २०१५ मा अमेरिकी दूतावासलाई पत्र लेखेको सार्वजनिक भएको थियो । तर सेनाले सो पत्र पठाउँदा तत्कालीन प्रधानमन्त्री केपी शर्मा ओलीलाई नसोधिएको भन्दै पूर्वसभामुख समेत रहेका नेम्वाङले सो पत्रको वैधानिकतामाथि प्रश्न उठेको बताउनुभयो ।
