काठमाण्डौँ । काठमाण्डौँ महानगरपालिकाको मेयर बालेन्द्र शाहले १९औँ राष्ट्रिय धान दिवसको उपलक्ष्यमा शुभकामना व्यक्त गरेका छन् । उनले आफ्नो फेसबुक पेज मार्फत काठमाण्डौँमा वस्ती बस्नु, सम्पदाको शहर वा राजधानी बन्नुमा किसानहरुको विशेष भुमिका रहेको र कृषि र किसानलाई बिर्सन नहुने बताएका छन् ।
उनले देशभरका लागि अन्न उब्जाउने किसानहरु प्रति सबै जना आभारी र जिम्मेवार हुनै पर्ने बताएका छन् । साथै काठमाण्डौँबाट निस्किने कुहिने फोहोरलाई मल बनाएर मलको हाहाकारलाई केहि कम गराउन सकिन्छ भन्नेमा महानगर क्रियाशिल रहेको र यस कामका लागि हुने सफलता र असफलताले देशभर उल्लेख्य फरक पार्नेमा सचेत रहेको पनि बताएका छन् ।
मेयर बालेन्द्र शाह आफ्नो फेसबुक पेजमा लेख्छन् :
“काठमाण्डौँमा वस्ती बस्नु, सम्पदाको शहर वा राजधानी बन्नुमा यहाँको उर्बरता र उब्जनीको ठुलो भुमिका छ । उर्बर माटोलाई खेति गर्न योग्य बनाउन माटोमा रगत र पसिना बगाउने किसानहरुको विशेष भुमिका छ । हो, अहिले हाम्रा प्राथमिकताहरु झांगिदै जाँदा यहाँका किसानहरुका मुद्दा कमजोर हुँदै गएका होलान् वा कृषि नै सिमान्तकृत हुदै गएको होला । तर, हामीलाई जे र जसले यहाँ ल्याइपुर्यायो, उसैलाई बिर्सने भन्ने हुदैन । हामीले यहाँको कृषि र किसानलाई सम्झिनै पर्छ । सँगसँगै, देशभरका लागि अन्न उब्जाउने किसानहरु प्रति आभारी र जिम्मेवार हुनै पर्छ ।
यसपालीको असार १५ र धान दिवसले सबैलाई किसान र कृषिप्रतिको जिम्मेवारी बोध गराउन सकोस् । गुणस्तरिय मल, बिउबिजन तथा कृषिसाधनहरु सहज र सुलभ मुल्यमा पर्याप्त प्राप्त हुन सकुन् । सबैलाई असार १५ र धान दिवसको शुभकामना छ ।
र, काठमाण्डौँमा निस्किने कुहिने फोहोरलाई मल बनाएर मलको हाहाकारलाई केहि कम गराउन सकिन्छ भन्नेमा काठमाण्डौँ महानगर क्रियाशिल छ । यस कामका लागि हुने सफलता र असफलताले देशभर नै उल्लेख्य फरक पार्नेमा हामी सचेत छौँ ।”
