लुम्बिनी प्रदेश सरकारकी स्वास्थ्य राज्यमन्त्री विमला वलीले मन्त्री पदबाट राजीनामा दिएकी छन् ।
गत जेठ महिनाको अन्तिम सातामा दाङका एकराज बस्नेतको घरमा गएर उनकी श्रीमती र छोरीमाथि हातपात गरी अभद्र व्यवहार गरेको आरोप राज्यमन्त्री वलीमाथि लागेको थियो । प्रदेश सरकारले सो घटनाको छानबिन गर्न एक समिति गठन गरेको थियो ।
राज्यमन्त्री वलीले सो छानबिन समितिलाई सघाउने उद्देश्यले राजीनामा दिएको बताइएको छ । उनले मुख्यमन्त्री कुलप्रसाद केसीसमक्ष राजीनामा पत्र बुझाएकी हुन् ।
राज्यमन्त्री वलीका पति उत्तरकुमार वलीको सडक दुर्घटनामा निधन भएको थियो । दाङ क्षेत्र नम्बर ३ (ख) बाट निर्वाचित उनको निधन भएपछि उनकी श्रीमती विमला सोही क्षेत्रमा भएको उपनिर्वाचनमा तत्कालीन नेकपाबाट निर्वाचित भएकी थिइन् ।
नेकपा विभाजन हुँदा उनले नेकपा (माओवादी केन्द्र) रोजेकी थिइन् । त्यसपछि उनी राज्यमन्त्री बनेकी थिइन् ।
