काठमाडौं । बामदेव गौतमले नयाँ राजनीतिक दल खोलेको घोषणा गरेका छन् । मंगलबार काठमाडौँमा पत्रकार सम्मेलन गरेर नयाँ राजनीतिक दल ‘नेकपा एकता राष्ट्रिय अभियान’ खोलेको घोषणा गरेका हुन् ।
उनको पार्टीले विघटन भएको नेपाल कम्युनिष्ट पार्टी (नेकपा)लाई फेरि पुनर्गठन गर्नु महत्वपूर्ण कार्यभार रहेको बताएको छ ।
संयोजक गौतमद्वारा जारी गरिएको विज्ञप्तीमा भनिएको छ, ‘ हामीले अगाडि सारेको यो पार्टीका तात्कालिन र दीर्घकालीन केही महत्वपूर्ण उद्देश्यहरु छन् । यस पार्टीको सबभन्दा महत्वपूर्ण र मुख्य कार्यभार त्यही विघटन भएको नेपाल कम्युनिष्ट पार्टी (नेकपा) लाई फेरि पुनर्गठन गर्नु हो ।’
यस्तै अगाडि भनिएको छ । ‘प्रतिनिधि सभा र प्रदेश सभा निर्वाचनपूर्व नै विभाजित कम्युनिष्ट पार्टीहरु नेकपा (एमाले), नेकपा (माओवादी केन्द्र)र नेकपा (एकीकृत समाजवादी)लाई एकीकृत हुन नसकेको अवस्थामा कार्यगत एकतामा आउन वातावरण सृजना गर्ने अर्को उद्देश्य रहेको छ ।’
कार्यगत एकतामा जाने अवस्था सृजना हुँदा तीन पार्टीहरु सहित राष्ट्रिय जनमोर्चा र जनता समाजवादी पार्टी समेतको बृहत वामपन्थी चुनावी मोर्चा निर्माण गर्ने कामलाई महत्वका साथ गर्ने कामको सूचीमा समावेश गरेको सो पार्टीले जनाएको छ ।
