काठमाडौँ । जनता समाजवादी पार्टी (जसपा) को संस्थापन पक्षले मन्त्री हेरफेर गर्ने तयारी गरेको छ । संस्थापन पक्षबाट पार्टी अध्यक्ष उपेन्द्र यादवले मन्त्री हेरफेर गर्न लागेको हो । असन्तुष्ट पक्षका डा. बाबुराम भट्टराईले पार्टीबाट अलग हुने तयारी गरेका बेला संस्थापन पक्षले मन्त्री हेरफेर गर्न लागेको बताइएको छ ।
अध्यष यादवले सोमबार साँझ बोलाएको कार्यकारिणी समिति सदस्यहरुको अनौपचारिक छलफलमा मन्त्री हेरफेरबारे कुरा भएको बताइएको छ । कार्यकारिणी समितिमा रहेका ३४ जना सदस्यमध्ये सो छलफलमा २० जना सदस्यको उपस्थिति थियो ।
मन्त्री हेरफेर हुँदा कृषिमन्त्री महेन्द्र राय यादव हट्ने पक्का भएको स्रोतले बताएको छ । उनी डा भट्टराईको पक्षमा लागेको बताइएको छ । संस्थापन पक्षले बोलाएको बैठकहरुमा अनुपस्थित रहँदै आएका यादव सोमबारको कार्यकारिणी समिति सदस्यहरुको छलफलमा पनि सहभागी भएका थिएनन् ।
जसपाबाट सहभागी भएका अन्य मन्त्रीहरुलाई फिर्ता बोलाएर नयाँ पठाउने वा नपठाउनेबारे निर्णय कार्यकारिणी समितिको अर्को बैठकमा गर्ने बताइएको छ ।
