काठमाडौं । इण्डोनेसियाको बालीमा एक अनौठो घटना घटेको छ । त्यहाँका एक स्थानीयले असंख्य रुपमा मरेका भँगेराहरु फेला पारेका छन् ।
उनले आकाशमा उडिरहेका भँगेरा चराहरु अचानक रहस्यमय तरिकाले भुइँमा खसेर भुइँमा मरेका भँगेराहरुको थुप्रो लागेको भेटेका हुन् ।
मरेका भँगेराहरु इण्डोनेसियाको एक चिहानघाटमा खसेका थिए । ती भँगेराहरु बालीको गियानयारमा एक चिहानघाटमा थुप्रो लागेका थिए ।
द सनको रिपोर्टअनुसार सुरुमा स्थानीय अधिकारीहरुले यी चराहरु मर्नुको कारण मौसममा खराबी आउनु र सम्भवतः अम्लीय वर्षा हुन सक्ने बताएका थिए ।
शनिबार भने स्थानीय प्रशासनले अर्को एक वक्तव्य जारी गर्दै यी चराहरु मर्नुको कारण कीटनाशक भएको बताएको छ ।
यी मरेका चराहरु फेला परेको केही समयमै इण्डोनेसियाको प्राकृतिक संसाधन संरक्षण केन्द्र (बीकेएसडिए) ले यस क्षेत्रमा यस्तो घटना पहिलो पटक भएको बताएको थियो । केन्द्रले वर्षामा ठूलो मात्रामा अम्ल भएको हुन सक्ने अनुमान गरेको छ ।
