काठमाडौँ । राष्ट्रपति विद्यादेवी भण्डारीले शीतल निवासमा आज आयोजित समारोहमा नवनियुक्त मन्त्रीहरुलाई पद तथा गोपनीयताको शपथ गराउनुभएको छ ।
नेकपा (एकीकृत समाजवादी) बाट नवनियुक्त चार मन्त्री र एक राज्यमन्त्रीले आज पद तथा गोपनीयताको शपथ लिनुभएको हो । एकीकृत समाजवादीबाट जीवनराम श्रेष्ठ संस्कृति, पर्यटन तथा नागरिक उड्डयनमन्त्री, मेटमणि चौधरी सहरी विकासमन्त्री, शेरबहादुर कुँवर श्रम, रोजगार तथा सामाजिक सुरक्षामन्त्री, भवानी खापुङ स्वास्थ्य तथा जनसंख्या मन्त्री र हिरा केसी स्वास्थ्य तथा जनसंख्या राज्मन्त्रीमा हिजो आइतबार नियुक्त हुनुभएको हो ।
पार्टीले यसअघिका चार मन्त्रीलाई फिर्ता बोलाएर नयाँ मन्त्रीको नाम सिफारिस गरेको थियो । फिर्ता हुने मन्त्रीहरुमा स्वास्थ्य तथा जनसंख्या मन्त्री विरोध खतिवडा, संस्कृति, पर्यटन तथा नागरिक उड्डयनमन्त्री प्रेमबहादुर आले, सहरी विकासमन्त्री रामकुमारी झाँक्री र श्रम, रोजगार तथा सामाजिक सुरक्षामन्त्री कृष्णकुमार श्रेष्ठ हुनुहुन्छ । यसअघि स्वास्थ्य तथा जनसंख्या राज्यमन्त्री रहनुभएका भवानी खापुङ अहिले मन्त्री बन्नुभएको छ ।
शपथ समारोहमा उपराष्ट्रपति नन्दबहादुर पुन प्रधानमन्त्री शेरबहादुर देउवा, सभामुख अग्निप्रसाद सापकोटालगायतको उपस्थिति थियो ।
