एजेन्सी । भारत उत्तरप्रदेशका मुख्यमन्त्री योगी आदित्यनाथको हेलिकप्टर आइतबार बिहान वाराणसीमा आपतकालीन अवतरण गर्नुपरेको छ ।
भारतीय सञ्चारमाध्यमका अनुसार १५५० फिटको उचाइमा उनको हेलिकोप्टर चरासँग ठोक्किएको थियो । तर, पाइलटको सचेतताले ठूलो दुर्घटना हुनबाट जोगियो ।
चराले ठक्कर दिएपछि पाइलटले हेलिकप्टरलाई सावधानीका रूपमा प्रहरी लाइन मैदानमा फिर्ता ल्याएका थिए । योगी प्रहरी लाइन मैदानबाट सर्किट हाउस फर्किएका छन् भने अब उनी सडकबाट बाबात्पुर विमानस्थल जानेछन् ।
योगी बिहान ९ बजे सर्किट हाउसबाट लखनउ जानका लागि पुलिस लाइन ग्राउन्डतर्फ प्रस्थान गरेका थिए । केही समयपछि उनको हेलिकप्टर यहाँबाट उड्यो । तर करिब १० मिनेटपछि हेलिकप्टर प्रहरी मैदानमा फर्किएको थियो । यसले प्रहरी र प्रशासनिक कर्मचारीमा तरंग पैदा गरेको छ । मुख्यमन्त्री तल आएपछि पिसौर पुल नजिकै १५५० फिटको उचाइमा आकाशमा हेलिकप्टरसँग चरा ठोक्किएको भेटियो ।
योगी दुई दिने भ्रमणमा शनिबार साँझ वाराणसी आएका थिए ।
