काठमाडौं । चौतर्फी दबाबमा परेको सरकारले पेट्रोलियम पदार्थको मूल्य घटाएको छ । उद्योग, वाणिज्य तथा आपूर्तिमन्त्री दिलेन्द्रप्रसाद बडूले शनिबार दिउँसो पत्रकार सम्मेलन गरी करमा कटौति गरेर भएपनि पेट्रोलमा प्रतिलिटर २० रुपैयाँ र डिजेलमा प्रतिलिटर २९ रुपैयाँ घटाउने निर्णय गरिएको जानकारी दिनु भएको हो ।
मारमा परेका जनतालाई राहत दिन करमा कटौति गरेर भएपनि पेट्रालियम पदार्थको मूल्य घटाउने निर्णय गरिएको मन्त्री बडूले बताउनु भयो । यस अघि पेट्रोलियम पदार्थको मूल्य घटाउने विषयमा सत्तारुढ पाँच दलबीच सहमति भएको थियो ।
प्रधानमन्त्री शेरबहादुर देउवासहितका सत्तागठबन्धनका शिर्ष नेताहरुसहित बसेको बैठकले गरेको निर्णय अनुसार पेट्रोलियम पदार्थको मूल्य घटाइएको पनि मन्त्री बडूले स्पष्ट पार्नु भयो ।
उहाँले भन्नु भयो, ‘पेट्रोलियम पदार्थको मूल्य बढदा सर्वसाधारणको जीवनमा यसले नकारात्मक असर परेको छ । बजारमा मूल्यवृद्धि यसैलाई कारण देखाएर गरिएको छ । त्यसैगरी अत्यावश्यक बस्तुहरुमा पनि यसैकारण मूल्य वृद्धि भएको छ । यसले सर्वसाधारण जनतामा मारमा परेको कुरामा सरकारसँग गम्भिर हुँदै करलाई समोयोजन गरेर पेट्रोलियम पदार्थको मूल्य घटाउने निर्णय गरिएको छ ।’
सरकारले मूल्य घटाएसँगै अब भरे राति १२ बजेदेखि लागू हुने गरी डिजेल प्रतिलिटर १६३ रुपैयाँ र पेट्रोल प्रतिलिटर १७९ पाईनेछ । यस अघि सरकारले रुस–युक्रेन युद्धलाई मुख्य कारण देखाएर यसको मूल्य वृद्धि गरेको थियो ।
