काठमाडौं । नेकपा एकीकृत समाजवादीका नेता मेटमणी चौधरीले आफ्नो पार्टीबाट मन्त्री बनेकाहरु फिर्ता आउनुपर्ने बताएका छन् ।
पार्टी कार्यालयमा सञ्चारकर्मीहरुसँग कुराकानी गर्दै उनले छ महिनासम्मका लागि मन्त्री बनेको र नौ महिना पुग्दासम्म पनि फिर्ता नआएको भन्दै आफ्नै पार्टीका मन्त्रीहरुसँग असन्तुष्टि व्यक्त गरेका हुन् ।
उनले भने ‘उहाँहरुलाई मन्त्री बनाउँदा सचिवालयको निर्णय नै थिएन । किन त्यसबेला मन्त्री हुनुभो ? मन्त्री हुन जाँदा दौडिएर छ महिनाका लागि मात्रै मन्त्री हुन जानुभएको हो । अहिले नौ महिना भइसक्यो । दुईपटक सचिवालय र एक पटक स्थायी कमिटीको बैठक बसेर त्यसलाई अनुमोदन गरिसकेको छ ।’
यस्तै, उनले कांग्रेस सभापति शेर बहादुर देउवा नेकपा एसकै कारण प्रधानमन्त्री बनेको बताउँदै प्रधानमन्त्रीबाट ‘रेस्पोन्स’ नआएको बताए ।
आफ्नो पार्टी अध्यक्षबाट सिफारिस भइसकेको तर, प्रधानमन्त्रीले त्यसलाई सम्बोधन नगरेको भन्दै मन्त्रीमण्डल हेरफेरमा प्रमुख कमजोरी प्रधानमन्त्री देउवाकै रहेको उनको आरोप छ ।
