काठमाडौँ । आज संवैधानिक इजलासमा संवैधानिक नियुक्तिविरुद्ध परेको रिटमाथि सुनुवाइ हुँदैछ । अधिवक्ता ओमप्रकाश अर्याल, वरिष्ठ अधिवक्ता दिनेश त्रिपाठीलगायतले संवैधानिक नियुक्तिविरुद्ध रिट दायर गर्नुभएको थियो ।
कामु प्रधानन्यायाधीश दीपककुमार कार्की, वरिष्ठतम न्यायाधीश हरिकृष्ण कार्की, विश्वम्भरप्रसाद श्रेष्ठ, ईश्वरप्रसाद खतिवडा र अनिलकुमार सिन्हाको संवैधानिक इजलास गठन भएको छ ।
अधिवक्ता अर्यालले २०७७ मंसिर १ गते र वरिष्ठ अधिवक्ता त्रिपाठीले मंसिर २ गते अध्यादेशका आधारमा संवैधानिक परिषद्को बैठक सञ्चालनसम्बन्धी कार्यविधि परिवर्तन गरेर विभिन्न संवैधानिक नियुक्ति दिइएको भन्दै सर्वोच्च अदालतमा रिट दायर गर्नुभएको थियो ।
उहाँहरुले अध्यादेशबाट संवैधानिक परिषदसम्बन्धी अध्यादेश ल्याइएको र त्यसैका आधारमा नियुक्ति भएको भन्दै नियुक्ति बदर गर्न माग गर्दै रिट दायर गर्नुभएको थियो ।
सो मुद्दामा वादीले अन्तरिम आदेशको माग गरेका थिए तर अन्तरिम आदेश जारी नहुने आदेश दिइएको थियो । संवैधानिक नियुक्ति लिई विपक्षी बनाइएका सबैलाई म्याद तामेल गर्ने गरी कारण देखाउ आदेश जारी मात्र जारी भएको थियो ।
सो म्याद तामेली गर्ने समय सकिएपछि बुधबारको संवैधानिक इजलासमा सो रिटमाथि सुनुवाइको मिति निर्धारण गरिएको हो ।
