काठमाडौँ । सञ्चारकर्मी हरिशरण लामिछानेले काठमाडौँ– ३ बाट संसदीय चुनावमा उम्मेदवारी दिने घोषणा गरेका छन् ।
पत्रकार रवि लामिछानेले आफ्नो राजनीतिक यात्राबारे घोषणा गर्न कार्यक्रम राखेको एकदिन अघि उनका दाइ हरिशरणले उम्मेदवारीको घोषणा गरेका हुन् ।
हरिशरणले सोमबार इच्छुक स्वतन्त्र उम्मेदवारहरूको अलाइन्स बनेको घोषणा गरेका छन् । हरिशरणले सोमबार ‘स्वतन्त्रहरूको तर्फबाट’ प्रेस नोट जारी गर्दै आफू काठमाडौँ– ३ बाट, रन्जु दर्शना काठमाडौँ– ५, पुकार बम काठमाडौँ– १ र सुमन सायमी काठमाडौँ– ८ बाट चुनाव लड्ने घोषणा गरेका छन् ।
उनले काठमाडौँ बाहिर पनि अलाइन्सका उम्मेदवार उठ्ने बताएका छन् । विश्व साइकल यात्री पुष्कर शाह दोलखाबाट चुनाव उठ्ने उनले दाबी गरेका छन् ।
यद्यपि, रविले राजनीतिमा आउँदा स्वतन्त्रहरूलाई जोड्ने बताए पनि प्रेस नोटमा रवि लामिछानेका बारे कुनै चर्चा गरिएको छैन ।
तीन दशक रेडियो नेपालमा काम गरेर राजीनामा दिएका हरिशरण अब सक्रिय राजनीतिमा होमिएका छन् ।
