काठमाडौं । एमाले निकट विद्यार्थी संगठन (अनेरास्ववियु) ले पेट्रोलियम पदार्थको मूल्यवृद्धि फिर्ता लिन माग गरेको छ। सोमबार एक विज्ञप्ति जारी गर्दै मुल्यवृद्वि फिर्ता नलिए त्यसकाविरुद्धको निर्णायक आन्दोलनमा सशक्त ढंगले उत्रने पनि चेतावनी दिएको हो।
अनेरास्ववियुकी अध्यक्ष सुनिता बरालद्वारा जारी विज्ञप्तिमा ‘देउवा नेतृत्वको जनतामारा नालायक सरकारले हिजो मध्य राती फेरि पनि पेट्रोलियम पदार्थको भारी मूल्यवृद्धि गरी पेट्रोलमा २१ रुपैयाँ, डिजेल र मट्टितेलमा २७ रुपैयाँ बढाएर पेट्रोलको मूल्य प्रतिलिटर रु १४९, डिजेल र मट्टीतेलको मूल्य प्रतिलिटर रु १५२ कायम गरी जनताको ढाड सेक्ने काम गरेको छ’ भनिएको छ ।
त्यस्तै आयल निगम चुहावट नियन्त्रण गर्न नभई कर्मचारीलाई बोनस र भत्ता बाड्न मस्त भएको अखिलको ठहर छ। विज्ञप्तिमा भनिएको छ, ‘देशमा राज्य छ कि छैन भन्ने अवस्था छ, मूल्य समायोजनको बहानामा अन्तर्राष्ट्रिय बजारमा मूल्य बढ्दा बढाउने तर घट्दा नघटाई, सरकार विभिन्न कर थुपारेर राजस्व उठाउन व्यस्त छ, आयल निगम चुहावट नियन्त्रण गर्न होइन कर्मचारीलाई बोनस र भत्ता बाड्न मस्त छ।’
आइतबार रातिबाट निगमले डिजेल तथा मट्टीतेलमा प्रतिलिटर २७ रुपैयाँले र पेट्रोलमा प्रतिलिटर २१ रुपैयाँले मूल्य वृद्धि गरेको छ ।
मूल्य वृद्धि भएपछि एक लिटर पेट्रोलको मूल्य १९९ रुपैयाँ पुगेको छ भने एक लिटर डिजेल र मट्टितेलको मूल्य १९२ रुपैयाँ पुगेको छ ।
